Shayad wo pyaar nahi

Pehli nazar me tumne usse pasand kar lia aur tumne usse, aur iss love at first sight ko tum mohobbat keh rahe ho, toh ho sakta hai tum galat ho,
kyuki yar pehli nazar mein toh hume antique cheeze bhi pasand aa jati hai, par hum usse ghar me rakhte hai dikhawe ke liye
bas kyuki der raat tak tum dono dher saari baate karrte hai aur isse tum mohobbat samjhte ho, toh ho sakta hai tum galat ho,
kyuki yar akelepan ke maare toh do anjaan musaafir bhi ek dusre se baat kar hi lete hai na?
Arrey agar kisi ladki ko dekh ke vo tumhara haath pakad leti hai aur kisi ladke ko dekh ke tum uska, aur iss cute jealousy ko tum mohobbat kehte ho, to ho sakta hai tum galat ho
kyuki yar parindon ko pakda jaata hai unhe pinjaron me qaid karrne ke liye, azaad karrne ke liye nahi;
bas kyuki ab tum dono ek dusre ki baate samajh paa rahe ho, aur isse tum mohobbat kehte ho, toh ho sakta hai tum galat ho
kyuki yaad rakho, do bhuke bhikhari bhi ek dusre ki bhukh samajh sakte hai, par mita nahi sakte
Arrey agar tum anniversary ka celebration har mahine karr rahe ho, aur isse tum mohobbat kehte ho, toh ho sakta hai tum galat ho
kyuki dastaan-e-ishq ko bayaan karrne ke liye saal ka koi number nahi chahiye hota
Arrey bas kyuki tum uski insta stories ka aur vo tumhari snapchat stories ka hissa ban chuke hai aur isse tum mohobbat keh rahe ho, toh ho sakta hai tum galat ho
kyuki yar mohobbat ko filters ke saath save nahi kia jaata, usse bas ussi lamhe me jiya jaata hai
Haan lekin,
Lekin agar jismo me ulajhne se pehle tum uski zulfon me ulajhna chahte ho,
agar vo bekhauf apna bachpana tumhare saamne zaya karr deti hai,
agar uske kapdo ke beparda hone se pehle tumne apne apne saare raaz uske saamne khol diye hai aur ussne bhi apne saare darr ka zikar tumhare saamne karr diya hai
agar uska har aasu tumhari hi kameez par behta ho, aur tumhari har muskaan ki vajah uski naadaniyan hi ho, toh yar shayad..
Shayad nahi, yar yahi Pyaar hai, aur agar yeh pyaar tumhe mil gaya hai toh isse pakad lo, jakad lo, gale laga lo aur jaha mauka mile bass,
bas isse kehte raho, ki tum isse kitna pyaar karrte ho
kyuki aisi mohobbat se mulakat hone mein, zindagi ka ek kaafi lamba arza beet jaata hai.